വിഷുപ്പുലരിയിൽ
ചെറുമഴച്ചിത്രമായ്‌
കണിക്കൊന്നതൻ
പുഞ്ചിരിപ്പൂക്കളായ്‌
മധുരമായ് പാടും
വിഷുപ്പക്ഷിതന്നീണമായ്..
ഹൃദയത്തിലിന്നൊരു കണിത്താലമൊരുങ്ങുന്നു…
ഇരുളും വെളിച്ചവും സമാസമമെങ്കിലും
പുലരൊളി വിഷുച്ചന്തം
സുഗന്ധപൂരിതം
നിലവിളക്കൊന്നിന്റെ പ്രഭാമണ്ഡലം
തെളിനീർക്കിണ്ടിയിൽ ജീവാമൃതം
തീവെയിൽക്കുട ചൂടും
വിഷുക്കാലമല്ലേ,
നന്മകൾ നേരുന്ന കണിക്കാലമല്ലേ..
ഓട്ടുരുളിക്കരികിലൊരു വാൽക്കണ്ണാടിയുണ്ടെ-
നിക്കെന്നെയും കാണാം
നിന്നെയും കാണാം
മിഴികളിലോർമകൾ കൊണ്ടു
കളം വരയ്ക്കാം
തേൻകണം പോലൊരു കവിത വന്നു നെഞ്ചിൽത്തൊടുന്നു
സ്നേഹമാണു വിഷുവെന്നത്രമേലാർദ്രമായ്…
