ഒരു തളിരില വിരിയാനൊരുങ്ങുന്നു,
മിഴിനീട്ടി പകലിനെ നോക്കുന്നു.
ഒരു ചെല്ലക്കാറ്റിലുലയുന്നു
ഒരു ശ്വാസതാളമായി ഉയരുന്നു.
ഹരിതകങ്ങളിൽ പൊൻവെയിൽ നിറയുന്നു
ഒരു പുതിയ ജീവൻ ഇതൾ വിരിയുന്നു.
നിറഞ്ഞവർഷങ്ങൾ ,പൊള്ളുന്നവേനൽ,
വർണ്ണവസന്തങ്ങൾ പോകവേ ,
ഒരു മഴത്തുള്ളിയിൽ ഉറപൊട്ടി
എന്റെ കോശങ്ങളിൽ അള്ളിപ്പിടിച്ചു നീ .
എന്നിൽ നിന്നും ഉയിരുതേടുന്ന
തളിരിതളായി,
പതിയെ എന്നിൽ വേരോടിച്ചു നീ .
കരുതലായി കാത്തുവെച്ചിത്ര നാൾ..
നിന്റെ ജീവസ്പന്ദമറിയുന്നു ഞാൻ
നിന്റെ ശ്വാസനിശ്വാസമറിയുന്നു ഞാൻ ..
എന്റെ ജീവന്റെ കുഞ്ഞു കിരണമായി
നീ മുള പൊട്ടുന്നതറിയുന്നു ,
നിന്റെ കുഞ്ഞു ചലനമറിയുന്നു….
കാത്തിരിപ്പ് പുഞ്ചിരി തൂകുന്നു !!
